ಉಟಾವಾ ವ್ಯಾಲಿ ವಿಶ್ವವಿದ್ಯಾಲಯದ ಕ್ಯಾಂಪಸ್ನಲ್ಲಿ ನಡೆದ ಡೊನಾಲ್ಡ್ ಟ್ರಂಪ್ ನಿಷ್ಠಾವಂತ ಚಾರ್ಲಿ ಕಿರ್ಕ್ ಹತ್ಯೆ ಪ್ರಕರಣಕ್ಕೆ ಸಂಬಂಧಿಸಿದಂತೆ, ಅಮೆರಿಕದ ಫೆಡರಲ್ ಬ್ಯೂರೋ ಆಫ್ ಇನ್ವೆಸ್ಟಿಗೇಷನ್ (ಎಫ್ಬಿಐ) ಶಂಕಿತ ಕೊಲೆಗಾರನ ಫೋಟೋಗಳನ್ನು ಬಿಡುಗಡೆ ಮಾಡಿದ್ದಾರೆ.
ಎಫ್ಬಿಐ ಬಿಡುಗಡೆ ಮಾಡಿರವು ಫೋಟೋಗಳಲ್ಲಿ ಬೇಸ್ಬಾಲ್ ಕ್ಯಾಪ್ ಮತ್ತು ಸನ್ಗ್ಲಾಸ್ ಧರಿಸಿದ ಯುವಕನೊಬ್ಬ, ವಿಶ್ವವಿದ್ಯಾಲಯದ ಕ್ಯಾಂಪಸ್ನಲ್ಲಿರುವ ಕಟ್ಟಡವೊಂದರ ಮೆಟ್ಟಿಲುಗಳನ್ನು ಇಳಿದು ಹೋಗುತ್ತಿರುವ ದೃಶ್ಯಗಳು ಸೆರೆಯಾಗಿವೆ. ಈ ಯುವಕ ಅಮೆರಿಕದ ಧ್ವಜ ಇರುವ ಟಿ-ಶರ್ಟ್ ಮತ್ತು ಬೆನ್ನ ಹಿಂದೆ ಒಂದು ಕಪ್ಪು ಬ್ಯಾಗ್ ಹಾಕಿಕೊಂಡಿರುವುದು ಫೋಟೋಗಳಲ್ಲಿ ಸ್ಪಷ್ಟವಾಗಿ ಗುರುತಿಸಬಹುದಾಗಿದೆ.
“ಉಟಾಹ್ ವ್ಯಾಲಿ ವಿಶ್ವವಿದ್ಯಾಲಯದಲ್ಲಿ ಚಾರ್ಲಿ ಕಿರ್ಕ್ ಅವರ ಹತ್ಯೆ ಪ್ರಕರಣಕ್ಕೆ ಸಂಬಂಧಿಸಿದಂತೆ, ಶಂಕಿತ ಆರೋಪಿಯ ಫೋಟೋಗಳನ್ನು ಬಿಡುಗಡೆ ಮಾಡಲಾಗಿದ್ದು, ಈತನನ್ನು ಪತ್ತೆಹೆಚ್ಚಲು ಸಾರ್ವಜನಿಕರ ಸಹಾಯವನ್ನು ಕೇಳುತ್ತಿದ್ದೇವೆ” ಎಂದು ಎಫ್ಬಿಐನ ಸಾಲ್ಟ್ ಲೇಕ್ ಸಿಟಿ ಕಚೇರಿ ತನ್ನ ಅಧಿಕೃತ ಎಕ್ಸ್ ಅಕೌಂಟ್ನಲ್ಲಿ ಪೋಸ್ಟ್ ಮಾಡಿದೆ.
ಬಹುಮಾನ ಘೋಷಣೆ:
ಇಷ್ಟೇ ಅಲ್ಲದೇ ಈ ಶಂಕಿತ ಕೊಲೆಗಾರನ ಬಗ್ಗೆ ಸುಳಿವು ನೀಡಿದವರಿಗೆ 1 ಲಕ್ಷ ಡಾಲರ್ ಬಹುಮಾನ ನೀಡುವುದಾಗಿ ಎಫ್ಬಿಐ ಸಾಲ್ಟ್ ಲೇಕ್ ಸಿಟಿ ಕಚೇರಿ ಘೋಷಿಸಿದೆ. ಶಂಕಿತ ಅದೇ ಕಾಲೇಜಿನ ವಿದ್ಯಾರ್ಥಿಯಾಗಿರಬಹುದು ಅಥವಾ ಚಾರ್ಲಿ ಕಿರ್ಕ್ ಆಯೋಜಿಸಿದ್ದ “ದಿ ಅಮೆರಿಕನ್ ಕಮ್ ಬ್ಯಾಕ್” ಮತ್ತು “ಪ್ರೂವ್ ಮಿ ರಾಂಗ್” ಸಭೆಯಲ್ಲಿ ಭಾಗವಹಿಸಲು ಕ್ಯಾಂಪಸ್ ಒಳಗೆ ಬಂದಿರಬಹುದು ಎಂದು ಉಟಾವಾ ಪೊಲೀಸ್ ಅಧಿಕಾರಿಗಳು ಅನುಮಾನ ವ್ಯಕ್ತಪಡಿಸಿದ್ದಾರೆ.
ಚಾರ್ಲಿ ಕಿರ್ಕ್ ಹತ್ಯೆ ನಡೆದು 24 ಗಂಟೆಗಳೂ ಕಳೆದರೂ, ಇದುವರೆಗೂ ಅಪರಾಧಿಯನ್ನು ಬಂಧಿಸಲಾಗಿಲ್ಲ. ಇದುವರೆಗೂ ಇಬ್ಬರು ಶಂಕಿತರನ್ನು ವಿಚಾರಣೆಗೆ ಗುರಿಪಡಿಸಿ ಆ ಬಳಿಕ ಬಿಡುಗಡೆ ಮಾಡಲಾಗಿದೆ. ಪೊಲೀಸರಿಂದ ವಿಚಾರಣೆಗೆ ಗುರಿಯಾದವರನ್ನು ಜಾರ್ಜ್ ಜಿನ್, ಜಕಾರಿಯಾ ಖುರೇಷಿ ಎಂದ ಗುರುತಿಸಲಾಗಿದೆ. ಚಾರ್ಲಿ ಕಿರ್ಕ್ ಅವರನ್ನು ಕೊಂದವರು ಯಾರು? ಎಂಬ ಪ್ರಶ್ನೆ ಇದೀಗ ಅಮೆರಿಕನ್ನರನ್ನು ಕಾಡುತ್ತಿದೆ.
ತನಿಖಾಧಿಕಾರಿಗಳ ಪ್ರಕಾರ ಶಂಕಿತ ವ್ಯಕ್ತಿ ಕಾಲೇಜು ವಯಸ್ಸಿನ ವ್ಯಕ್ತಿ, ಚಾರ್ಲಿ ಕಿರ್ಕ್ ಅವರ ಮೇಲೆ ಗುಂಡು ಹಾರಿಸಿ ಕಟ್ಟಡದ ಛಾವಣಿಯಿಂದ ಜಿಗಿದು ಕಾಡಿನಲ್ಲಿ ತಲೆಮರೆಸಿಕೊಂಡಿದ್ದಾನೆ. “ವಿಶ್ವವಿದ್ಯಾಲಯ ಸಮೀಪದ ಅರಣ್ಯ ಪ್ರದೇಶದಲ್ಲಿ ಟವಲ್ನಲ್ಲಿ ಸುತ್ತಿದ್ದ ಪಿಸ್ತೂಲು ಪತ್ತೆಯಾಗಿದ್ದು, ಕೊಲೆಗಾರ ಅದೇ ಕಾಡಿನ ದಾರಿಯ ಮೂಲಕ ತಲೆಮರೆಸಿಕೊಂಡಿದ್ದಾನೆ” ಎಂದು ಸಾಲ್ಟ್ ಲೇಕ್ ಸಿಟಿ ಎಫ್ಬಿಐ ವಿಶೇಷ ಏಜೆಂಟ್ ರಾಬರ್ಟ್ ಬೋಲ್ಸ್ ಅನುಮಾನ ವ್ಯಕ್ತಪಡಿಸಿದ್ದಾರೆ.
ಕೊಲೆ ನಡೆದ ಸ್ಥಳದಿಂದ ಪಿಸ್ತೂಲಿನಿಂದ ಸಿಡಿದ ಮದ್ದುಗುಂಡುಗಳನ್ನು ವಶಪಡಿಸಿಕೊಳ್ಳಲಾಗಿದ್ದು, ಪಾದರಕ್ಷೆ ಮತ್ತು ಮುಂಗೈ ಮುದ್ರೆಗಳು ಕೂಡ ಕಂಡುಬಂದಿವೆ. ಇದೀಗ ಶಂಕಿತ ಕೊಲೆಗಾರನ ಫೋಟೋ ಕೂಡ ಬಿಡುಗಡೆಯಾಗಿದ್ದು, ಎಫ್ಬಿಐ ತನಿಖೆಯನ್ನು ಚುರುಕುಗೊಳಿಸಿದೆ.
ಚಾರ್ಲಿ ಕಿರ್ಕ್ ಹತ್ಯೆ:
ಕಳೆದ ಬುಧವಾರ (ಸೆ.10) ಉಟಾವಾ ವಿವಿ ಕ್ಯಾಂಪಸ್ನಲ್ಲಿ ಅಮೆರಿಕದ ಬಲಪಂಥೀಯ ಕಾರ್ಯಕರ್ತ ಚಾರ್ಲಿ ಕಿರ್ಕ್ ವಿದ್ಯಾರ್ಥಿಗಳನ್ನು ಉದ್ದೇಶಿಸಿ ಭಾಷಣ ಮಾಡುತ್ತಿದ್ದರು. ಈ ವೇಳೆ ಆಗಂತುಕನೋರ್ವ ಚಾರ್ಲಿ ಕಿರ್ಕ್ ಅವರ ಮೇಲೆ ಗುಂಡಿನ ದಾಳಿ ನಡೆಸಿದ್ದ. ಗುಂಡೇಟಿನಿಂದ ಗಾಯಗೊಂಡಿದ್ದ ಚಾರ್ಲಿ ಕಿರ್ಕ್ ಅವರನ್ನು ಕೂಡಲೇ ಆಸ್ಪತ್ರೆಗೆ ಸಾಗಿಸಲಾಯಿತಾದರೂ, ಮಾರ್ಗ ಮಧ್ಯೆಯೇ ಅವರು ಕೊನೆಯುಸಿರೆಳೆದರು.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಬೆಂಬಲಿಗರಾಗಿದ್ದ ಚಾರ್ಲಿ ಕಿರ್ಕ್, ಟ್ರಂಪ್ ಅವರ ಅಮೆರಿಕ ಫಸ್ಟ್ ನೀತಿಯ ಪ್ರಬಲ ಪ್ರತಿಪಾದಕರಾಗಿದ್ದರು. ಚಾರ್ಲಿ ಕಿರ್ಕ್ ಅವರ ಈ ರಾಜಕೀಯ ಹತ್ಯೆ ಅಮೆರಿಕದಲ್ಲಿ ಭಾರೀ ಸಂಚಲನವನ್ನೇ ಸೃಷ್ಟಿಸಿದೆ. ಡೊನಾಲ್ಡ್ ಟ್ರಂಪ್ ಅವರು “ಚಾರ್ಲಿ ಕಿರ್ಕ್ ಹತ್ಯೆಯಲ್ಲಿ ಎಡಪಂಥೀಯರ ಕೈವಾಡ ಇದೆ” ಎಂದು ಆರೋಪಿಸಿದ್ದಾರೆ.
