‘ಈರೇಗೆ ವೋಟ್ ಪಾಡ್ದೆ.. ಎಂಕೊಂಜಿ ಮದ್ಮೆ ಮಲ್ಪುಲೆ.. ಅಣ್ಣಾ..!!’

ಪೆಟ್ರೋಲ್ ಬಂಕ್ ಸಿಬ್ಬಂದಿಯಿಂದ ಶಾಸಕರಿಗೆ ವಿಚಿತ್ರ ಮನವಿ!

ಯಾವ ಶಾಸಕರು? ಎಲ್ಲಿಯ ಪೆಟ್ರೋಲ್ ಬಂಕ್..? ಇಲ್ಲಿದೆ ಸಂಪೂರ್ಣ ವಿದ್ಯಮಾನ

ಕಾರಿಗೆ ಪೆಟ್ರೋಲ್ ಹಾಕಲು ಬಂದ ಬಿಜೆಪಿ ಶಾಸಕರ ಬಳಿ ಪೆಟ್ರೋಲ್ ಬಂಕ್ ನೌಕರನೋರ್ವ ತನಗೆ ಮದುವೆ ಮಾಡಿಸಿಕೊಡುವಂತೆ ದುಂಬಾಲು ಬಿದ್ದರುವ ವಿಚಿತ್ರ ಘಟನೆಯೊಂದು ಉತ್ತರಪ್ರದೇಶದಲ್ಲಿ ನಡೆದಿದ್ದು ಸ್ವತಃ ಶಾಸಕರೇ ಈ ವಿಡಿಯೋ ಅನ್ನು ತಮ್ಮ ಫೇಸ್ ಬುಕ್ ನಲ್ಲಿ ಹಾಕಿಕೊಂಡಿದ್ದಾರೆ.

ಉತ್ತರ ಪ್ರದೇಶದ ಮಹೋಬಾ ಜಿಲ್ಲೆಯ ಚರಖಾರಿ ಶಾಸಕ ಬ್ರಿಜ್‌ಭೂಷಣ್ ರಜಪೂತ್ ತಮ್ಮ ಕಾರಿನಲ್ಲಿ ಪೆಟ್ರೋಲ್ ತುಂಬಿಸಲು ತಮ್ಮ ಬೆಂಗಾವಲು ಪಡೆಯೊಂದಿಗೆ ಚರಖಾರಿ ಪಟ್ಟಣದಲ್ಲಿರುವ ಮೌರ್ಯ ಪೆಟ್ರೋಲ್ ಪಂಪ್‌ಗೆ ಬಂದಿದ್ದರು. ಈ ವೇಳೆ ಪೆಟ್ರೋಲ್ ಪಂಪ್‌ನಲ್ಲಿ ಕೆಲಸ ಮಾಡುತ್ತಿದ್ದ ಅಖಿಲೇಂದ್ರ ಖರೆ ಎಂಬ ವ್ಯಕ್ತಿ ಶಾಸಕರ ಬಳಿ ತೆರಳಿ ನಿಮಗೆ ನಾನು ಮತ ಹಾಕಿದ್ದೇನೆ ದಯವಿಟ್ಟು ನನಗೊಂದು ಮದುವೆ ಮಾಡಿಸಿ ಎಂದು ತನ್ನ ಕಷ್ಟ ಹೇಳಿಕೊಂಡಿದ್ದಾನೆ ಅಲ್ಲದೆ ಈಗಾಗಲೇ ಹಲವು ಹುಡುಗಿಯರನ್ನು ನೋಡಿದ್ದು ಯಾವುದು ಸರಿಹೊಂದಲಿಲ್ಲ ಹಾಗಾಗಿ ನೀವೇ ಮುಂದೆ ನಿಂತು ನನಗೆ ಮದುವೆ ಮಾಡಿಸಿಕೊಡಬೇಕು ಎಂದು ಕೇಳಿಕೊಂಡಿದ್ದಾನೆ. ಇದಕ್ಕೆ ಸ್ಪಂದಿಸಿದ ಶಾಸಕ ರಾಜಪೂತ್ ನಿನಗೆ ಯಾವ ರೀತಿಯ ಹುಡುಗಿ ಬೇಕು, ಮನೆಯಲ್ಲಿ ಯಾರೆಲ್ಲಾ ಇದ್ದೀರಿ, ನಿನ್ನ ಸಂಬಳ ಎಷ್ಟು ಎಂದೆಲ್ಲಾ ಶಾಸಕರು ಕೇಳಿದ್ದು ಮದುವೆ ಮಾಡಿಸುವ ಭರವಸೆ ನೀಡಿದ್ದಾರೆ.

ಶಾಸಕರ ಜೊತೆ ಪೆಟ್ರೋಲ್ ಬಂಕ್ ನೌಕರನ ಸಂಭಾಷಣೆಯನ್ನು ಅಲ್ಲಿದ್ದ ಉಳಿದ ನೌಕರರು ವಿಡಿಯೋ ಮಾಡಿದ್ದು ಅದೇ ವಿಡಿಯೋವನ್ನು ಶಾಸಕರು ತಮ್ಮ ಫೇಸ್ ಬುಕ್ ನಲ್ಲಿ ಪೋಸ್ಟ್ ಮಾಡಿದ್ದಾರೆ.