ಪಶ್ಚಿಮ ಬಂಗಾಳದಲ್ಲಿ ಸಂಭವಿಸಿದ ಭೀಕರ ರೈಲು ದುರಂತದಲ್ಲಿ ಮಹಿಳಾ ಲೋಕೋ ಪೈಲಟ್ ಸಾವನ್ನಪ್ಪಿದ್ದಾರೆ. ಈ ದುರಂತವು ರೈಲ್ವೆ ಸಿಬ್ಬಂದಿಗಳ ಸುರಕ್ಷತೆ ಮತ್ತು ಸೌಲಭ್ಯಗಳ ಬಗ್ಗೆ ಗಂಭೀರ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.
ಘಟನೆ ವಿವರ: ಮಲ್ಡಾ ನಿಲ್ದಾಣದಿಂದ ಮಹಿಪಾಲ್ ರಸ್ತೆ ನಿಲ್ದಾಣಕ್ಕೆ ಖಾಲಿ ರೈಲು ತರಲು ಎಸ್.ಕೆಮಂಡಲ್ ಮತ್ತು ಅವರ ಸಹಾಯಕ ಮಹಾರಾಣಿ ಕುಮಾರಿ ಇಂಜಿನ್ನಲ್ಲಿ ತೆರಳುತ್ತಿದ್ದರು. ಮಹಾರಾಣಿ ಕುಮಾರಿಗೆ ಶೌಚಾಲಯಕ್ಕೆ ಹೋಗಬೇಕಿದ್ದರಿಂದ ಅವರು ನಿಲ್ದಾಣದ ಕಟ್ಟಡದಲ್ಲಿರುವ ಶೌಚಾಲಯಕ್ಕೆ ಹೋಗಲು ಇಂಜಿನ್ನಿಂದ ಇಳಿದಿದ್ದು, ಅವರು ಹಿಂತಿರುಗುವಾಗ ನವದ್ವೀಪ್ ಧಾಮ್ ಎಕ್ಸ್ಪ್ರೆಸ್ ವೇಗವಾಗಿ ಬರುತ್ತಿತ್ತು. ರೈಲಿನ ವೇಗ ಗಂಟೆಗೆ 100 ಕಿಮೀ ಇತ್ತು ಎನ್ನಲಾಗಿದ್ದು, ಆದರೆ ತಿರುವು ಇದ್ದುದರಿಂದ ರೈಲು ಕಾಣಿಸಿಲ್ಲ ಅಷ್ಟರಲ್ಲಿ ರೈಲು ಅವರಿಗೆ ಡಿಕ್ಕಿ ಹೊಡೆದಿದ್ದು, ಈ ಅಪಘಾತದಲ್ಲಿ ಅವರು ಸಾವನ್ನಪ್ಪಿದರು.
ಈ ಘಟನೆಯಿಂದ ರೈಲ್ವೆ ನೌಕರರಲ್ಲಿ ಆಕ್ರೋಶ ಉಂಟಾಗಿದೆ. ಇಂಜಿನ್ನಲ್ಲಿ ಶೌಚಾಲಯದ ವ್ಯವಸ್ಥೆ ಇಲ್ಲದ ಕಾರಣದಿಂದಲೇ ಈ ದುರಂತ ಸಂಭವಿಸಿದೆ ಎಂದು ಲೋಕೋ ಪೈಲಟ್ಸ್ ಅಸೋಸಿಯೇಷನ್ ಆರೋಪಿಸಿದೆ. ದೇಶಾದ್ಯಂತ ಸುಮಾರು 2000 ಮಹಿಳಾ ರೈಲ್ವೆ ಚಾಲಕರು ಸೇರಿದಂತೆ ಅನೇಕ ನೌಕರರು ರೈಲ್ವೆ ಆಡಳಿತದ ವಿರುದ್ಧ ಪ್ರತಿಭಟನೆ ನಡೆಸಿದ್ದಾರೆ ಮತ್ತು ತಮ್ಮ ಸುರಕ್ಷತೆಗಾಗಿ ಸೂಕ್ತ ಸೌಲಭ್ಯಗಳನ್ನು ಒದಗಿಸುವಂತೆ ಒತ್ತಾಯಿಸಿದ್ದಾರೆ. ‘ಆಲ್ ಇಂಡಿಯಾ ಲೋಕೋ ರನ್ನಿಂಗ್ ಸ್ಟಾಫ್ ಅಸೋಸಿಯೇಷನ್’ ಶಾಖಾ ಅಧ್ಯಕ್ಷ ರವಿ ರಂಜನ್ ಅವರು ಮೃತರ ಕುಟುಂಬಕ್ಕೆ ಆರ್ಥಿಕ ಸಹಾಯ ನೀಡುವಂತೆ ಒತ್ತಾಯಿಸಿದ್ದಾರೆ.
ಅಲ್ಲದೆ ಎಲ್ಲಾ ಇಂಜಿನ್ಗಳಲ್ಲಿ ಶೌಚಾಲಯದ ಸೌಲಭ್ಯವನ್ನು ಒದಗಿಸುವಂತೆ ಅವರು ಒತ್ತಾಯಿಸಿದ್ದಾರೆ. ಭವಿಷ್ಯದಲ್ಲಿ ಇಂತಹ ದುರಂತಗಳು ಸಂಭವಿಸದಂತೆ ರೈಲ್ವೆ ಆಡಳಿತವು ಸೂಕ್ತ ಕ್ರಮಗಳನ್ನು ಕೈಗೊಳ್ಳಬೇಕು ಎಂದು ಒತ್ತಾಯಿಸಲಾಗುತ್ತಿದೆ.
ವಾಸ್ತವವಾಗಿ, ಲೋಕೋಪೈಲಟ್ಗಳಿಗೆ ರೈಲಿನ ಇಂಜಿನ್ನಲ್ಲಿ ಶೌಚಾಲಯದ ಸೌಲಭ್ಯ ಇರುವುದಿಲ್ಲ. ವರದಿಗಳ ಅಂಕಿಅಂಶಗಳನ್ನು ನೋಡಿದರೆ ಕೇವಲ 97 ರೈಲು ಲೋಕೋಮೋಟಿವ್ಗಳಲ್ಲಿ ಮಾತ್ರ ಶೌಚಾಲಯದ ಸೌಲಭ್ಯ ಲಭ್ಯವಿದೆ. ಅಷ್ಟೇ ಅಲ್ಲ, ಅನೇಕ ನಿಲ್ದಾಣಗಳಲ್ಲಿ ರನ್ನಿಂಗ್ ರೂಮ್ಗಳಲ್ಲಿಯೂ ಮಹಿಳೆಯರಿಗೆ ಪ್ರತ್ಯೇಕ ಶೌಚಾಲಯಗಳಿಲ್ಲ. ರನ್ನಿಂಗ್ ರೂಮ್ ಎಂದರೆ ಲೋಕೋ ಪೈಲಟ್, ಅಸಿಸ್ಟೆಂಟ್ ಲೋಕೋ ಪೈಲಟ್ ಮತ್ತು ಸರಕು ಸಾಗಣೆ ಸಿಬ್ಬಂದಿ ಸೇರಿದಂತೆ ನೌಕರರು ತಮ್ಮ ತವರು ನಿಲ್ದಾಣ ಹೊರತುಪಡಿಸಿ ಇತರ ನಿಲ್ದಾಣದಲ್ಲಿ ಕರ್ತವ್ಯದ ನಂತರ ಅಥವಾ ಶಿಫ್ಟ್ ನಡುವೆ ವಿಶ್ರಾಂತಿ ಪಡೆಯುವ ಕೊಠಡಿಯಾಗಿದೆ.
ರೈಲಿನ ಇಂಜಿನ್ನಲ್ಲಿ ಶೌಚಾಲಯವಿಲ್ಲದ ಕಾರಣ ಮಹಿಳಾ ಚಾಲಕರು ನೀರು ಕುಡಿಯುವುದನ್ನು ಕಡಿಮೆ ಮಾಡುತ್ತಾರೆ. ಕೆಲವು ಮಹಿಳೆಯರು ಸಾಕಷ್ಟು ಸೌಲಭ್ಯಗಳಿಲ್ಲದ ಕಾರಣ ತಮ್ಮ ಕನಸುಗಳೊಂದಿಗೆ ರಾಜಿ ಮಾಡಿಕೊಳ್ಳುತ್ತಾರೆ ಮತ್ತು ಕಚೇರಿಯಲ್ಲಿ ಕೆಲಸ ಮಾಡುವ ಡ್ಯೂಟಿಯನ್ನು ಸ್ವೀಕರಿಸುತ್ತಾರೆ. ಪುರುಷರಿಗೂ ಅನೇಕ ಸೌಲಭ್ಯಗಳ ಕೊರತೆಯಿದೆ; ಆದರೆ ಮಹಿಳಾ ಚಾಲಕರು ಮುಟ್ಟಿನ ಅವಧಿಯಲ್ಲಿ ಹೆಚ್ಚು ತೊಂದರೆಗಳನ್ನು ಎದುರಿಸುತ್ತಾರೆ, ಆದ್ದರಿಂದ ಹೆಚ್ಚಿನ ಮಹಿಳೆಯರು ಮುಟ್ಟಿನ ದಿನಗಳಲ್ಲಿ ಶೌಚಾಲಯಗಳ ಕೊರತೆಯಿಂದಾಗಿ ರಜೆ ತೆಗೆದುಕೊಳ್ಳಲು ಬಯಸುತ್ತಾರೆ. ಈ ಘಟನೆಯು ರೈಲ್ವೆ ಸಿಬ್ಬಂದಿಗಳ ಸುರಕ್ಷತೆ ಮತ್ತು ಸೌಲಭ್ಯಗಳ ಬಗ್ಗೆ ಗಂಭೀರ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.
