ಉತ್ತರ ಪ್ರದೇಶದ ಬಂಡಾದ 33 ವರ್ಷದ ಮಹಿಳೆ ಶಹಜಾದಿ ಖಾನ್ ಅವರಿಗೆ ಯುಎಇಯಲ್ಲಿ ಮರಣದಂಡನೆ ಶಿಕ್ಷೆಯನ್ನು ಜಾರಿ ಮಾಡಲಾಗಿದೆ. ಫೆ. 15ರಂದೇ ಆಕೆಗೆ ಶಿಕ್ಷೆಯನ್ನು ಜಾರಿ ಮಾಡಲಾಗಿದೆ ಎಂದು ವಿದೇಶಾಂಗ ಇಲಾಖೆ ಮಾಹಿತಿ ನೀಡಿದೆ. ಲಸಿಕೆ ಹಾಕಿದ ನಂತರ ಅವರ ಆರೈಕೆಯಲ್ಲಿ ನಾಲ್ಕು ತಿಂಗಳ ಮಗು ಸಾವನ್ನಪ್ಪಿತ್ತು.
ಈ ಪ್ರಕರಣದಲ್ಲಿ ಅವರಿಗೆ ಮರಣದಂಡನೆ ಶಿಕ್ಷೆಯನ್ನು ಯುಎಇ ಅಗ್ರ ಕೋರ್ಟ್‌ ನೀಡಿತ್ತು. ಅವರಿಗೆ ಫೆ.15 ರಂದು ಗುಂಡು ಹಾರಿಸಿ ಶಿಕ್ಷೆ ಜಾರಿ ಮಾಡಲಾಗಿದೆ ಎಂದು ಕೇಂದ್ರ ಸರ್ಕಾರ ಸೋಮವಾರ ದೆಹಲಿ ಹೈಕೋರ್ಟ್‌ಗೆ ಮಾಹಿತಿ ನೀಡಿದೆ.
ಶಹ್ಜಾದಿ ಖಾನ್ ಅವರನ್ನು, ತಮ್ಮ ಜತೆಗಿದ್ದ ನಾಲ್ಕು ತಿಂಗಳ ಮಗುವಿನ ಮರಣಕ್ಕಾಗಿ ದೋಷಾರೋಪಣೆ ಮಾಡಲಾಗಿತ್ತು. ಡಿಸೆಂಬರ್ 2022ರಲ್ಲಿ ಈ ಘಟನೆ ಸಂಭವಿಸಿದಾಗ, ಅವರು ಅಬುಧಾಬಿಯಲ್ಲಿ ಮಕ್ಕಳ ಆರೈಕೆ ಕೆಲಸ ಮಾಡುತ್ತಿದ್ದರು. ಮಗುವು ನಿಯಮಿತ ಲಸಿಕೆ ಪಡೆದುಕೊಂಡ ಬಳಿಕ ಸಾವನ್ನಪ್ಪಿದ್ದು, ಈ ಮರಣಕ್ಕೆ ಕಾರಣರಾದ ಆರೋಪದಲ್ಲಿ ಅವರನ್ನು ದೋಷಿ ಎಂದು ಗುರುತಿಸಿ ಶಿಕ್ಷೆ ನೀಡಲಾಗಿತ್ತು.
ಶನಿವಾರ, ಶಹ್ಜಾದಿ ಖಾನ್ ಅವರ ತಂದೆ ದೆಹಲಿ ಹೈಕೋರ್ಟ್‌ಗೆ ಅರ್ಜಿ ಸಲ್ಲಿಸಿ, ಅವರ ಈಗಿನ ಸ್ಥಿತಿಯನ್ನು ಖಚಿತಪಡಿಸಿಕೊಳ್ಳಲು ಮತ್ತು ಸಂಬಂಧಿತ ಸರ್ಕಾರಿ ಅಧಿಕಾರಿಗಳಿಗೆ ಪ್ರಕಟಣೆ ಹೊರಡಿಸಲು ನಿರ್ದೇಶನ ನೀಡುವಂತೆ ಮನವಿ ಮಾಡಿದರು.
ಸರ್ಕಾರದ ಪ್ರಕಾರ, ಉತ್ತರ ಪ್ರದೇಶದ ಬಂಡಾ ಜಿಲ್ಲೆಗೆ ಸೇರಿದ ಶಹ್ಜಾದಿ ಅವರನ್ನು ಫೆಬ್ರವರಿ 15ರಂದು ಗುಂಡು ಹಾರಿಸಿ ಶಿಕ್ಷೆ ಜಾರಿ ಮಾಡಲಾಗಿದ್ದು, ಅವರ ಅಂತ್ಯಸಂಸ್ಕಾರವನ್ನು ಮಾರ್ಚ್ 5 ರಂದು ನಡೆಸಲು ಉದ್ದೇಶಿಸಲಾಗಿದೆ. ಫೆಬ್ರವರಿ 28 ರಂದು ಈ ವಿಷಯದ ಬಗ್ಗೆ ವಿದೇಶಾಂಗ ವ್ಯವಹಾರಗಳ ಸಚಿವಾಲಯಕ್ಕೆ ಮಾಹಿತಿ ಲಭ್ಯವಾಗಿದೆ ಎಂದು ಹೈಕೋರ್ಟ್‌ಗೆ ತಿಳಿಸಲಾಗಿದೆ.ಇನ್ನು ಮಾರ್ಚ್ 5 ರಂದು ಖಾನ್ ಅಂತ್ಯಕ್ರಿಯೆಗಾಗಿ ಅಬುಧಾಬಿಗೆ ಪ್ರಯಾಣ ಬೆಳೆಸಲು ಕುಟುಂಬಕ್ಕೆ ಭಾರತೀಯ ರಾಯಭಾರ ಕಚೇರಿ ನೆರವಾಗುತ್ತದೆ.
