ಹಬ್ಬದ ಸಂಭ್ರಮದ ನಡುವೆಯೇ ನಾಗರಿಕರ ಸುರಕ್ಷತೆ ಮತ್ತು ಮಾದಕ ದ್ರವ್ಯ ಮುಕ್ತ ವಾತಾವರಣವನ್ನು ಖಚಿತಪಡಿಸಿಕೊಳ್ಳುವ ಉದ್ದೇಶದಿಂದ ಮಂಗಳೂರು ನಗರ ಪೊಲೀಸರು ವ್ಯಾಪಕ ಪೂರ್ವಭಾವಿ ಹಾಗೂ ತಡೆಗಟ್ಟುವ ಕಾರ್ಯಾಚರಣೆ ಕೈಗೊಂಡಿದ್ದಾರೆ.
ಈ ಕಾರ್ಯಾಚರಣೆಯ ಭಾಗವಾಗಿ ನಗರ ವ್ಯಾಪ್ತಿಯ ಎಲ್ಲ ಪೊಲೀಸ್ ಠಾಣೆಗಳ ತಂಡಗಳು ವಿಶ್ವಾಸಾರ್ಹ ಗುಪ್ತಚರ ಮಾಹಿತಿ ಹಾಗೂ ನಡವಳಿಕಾ ಸೂಚಕಗಳ ಆಧಾರದ ಮೇಲೆ ಸುಮಾರು 1,000 ಶಂಕಿತ ವ್ಯಕ್ತಿಗಳ ತಪಾಸಣೆ ನಡೆಸಿವೆ. ಇದರಲ್ಲಿ 52 ಮಂದಿ ಮಾದಕ ದ್ರವ್ಯ ಸೇವನೆಗೆ ಧನಾತ್ಮಕವಾಗಿ ಪತ್ತೆಯಾಗಿದ್ದು, ಅವರಲ್ಲಿ 25 ಮಂದಿ ವಿದ್ಯಾರ್ಥಿಗಳು (ಇದರಲ್ಲಿ 2 ಸ್ಥಳೀಯರು ಹಾಗೂ 23 ಮಂದಿ ಜಿಲ್ಲೆಯ ಹೊರಗಿನವರು) ಹಾಗೂ 27 ಮಂದಿ ವಿದ್ಯಾರ್ಥಿಯೇತರರು ಸೇರಿದ್ದಾರೆ. ವಿದ್ಯಾರ್ಥಿಯೇತರರಲ್ಲಿ 17 ಮಂದಿ ಕಾರ್ಮಿಕರು ಹಾಗೂ ವಿವಿಧ ವೃತ್ತಿಗಳಲ್ಲಿ ತೊಡಗಿಸಿಕೊಂಡಿರುವ 10 ಮಂದಿ ಇದ್ದಾರೆ. ಸಂಬಂಧಪಟ್ಟವರಿಗೆ ಕೌನ್ಸೆಲಿಂಗ್ ನೀಡಲಾಗಿದ್ದು, ಕಾನೂನುಬದ್ಧವಾಗಿ ಅಗತ್ಯ ಕ್ರಮಗಳನ್ನು ಕೈಗೊಳ್ಳಲಾಗಿದೆ.
ಇದೇ ವೇಳೆ, ಎರಡು ಪ್ರತ್ಯೇಕ ಪ್ರಕರಣಗಳಲ್ಲಿ ಮೂರು ಮಾದಕ ದ್ರವ್ಯ ಮಾರಾಟಗಾರರನ್ನು ಪೊಲೀಸರು ಬಂಧಿಸಿದ್ದಾರೆ. ಒಂದನೇ ಪ್ರಕರಣದಲ್ಲಿ 50 ಗ್ರಾಂ ಎಂಡಿಎಂಎ ಸಹಿತ ಒಬ್ಬ ಆರೋಪಿಯನ್ನು, ಇನ್ನೊಂದು ಪ್ರಕರಣದಲ್ಲಿ 200 ಗ್ರಾಂ ಎಂಡಿಎಂಎ ಸಹಿತ ಇಬ್ಬರು ಆರೋಪಿಗಳನ್ನು ವಶಕ್ಕೆ ಪಡೆಯಲಾಗಿದೆ. ಬಂಧಿತರೆಲ್ಲರೂ ಅಪರಾಧ ಹಿನ್ನೆಲೆ ಹೊಂದಿದವರಾಗಿದ್ದು, ಈ ಮೊದಲು ಕೂಡ ಪೊಲೀಸ್ ನಿಗಾವಹಣೆಯಲ್ಲಿದ್ದರು. ಈ ಬಂಧನಗಳು ಮಾದಕ ದ್ರವ್ಯ ಪೂರೈಕೆ ಜಾಲವನ್ನು ಮುರಿಯುವತ್ತ ಪ್ರಮುಖ ಹೆಜ್ಜೆಯಾಗಿವೆ.
ಈ ಸಮಗ್ರ ಕಾರ್ಯಾಚರಣೆಯಿಂದ ಗ್ರಾಹಕರ ಸ್ವಭಾವ ಹಾಗೂ ಮಾದಕ ದ್ರವ್ಯ ಬಳಕೆಯ ಪ್ರವೃತ್ತಿಗಳ ಬಗ್ಗೆ ಮಹತ್ವದ ಮಾಹಿತಿ ಲಭಿಸಿದ್ದು, ಮುಂದಿನ ದಿನಗಳಲ್ಲಿ ತಡೆಗಟ್ಟುವ ಕಾರ್ಯತಂತ್ರಗಳನ್ನು ಇನ್ನಷ್ಟು ಬಲಪಡಿಸಲು ಸಹಕಾರಿಯಾಗಲಿದೆ. ಯುವಜನತೆಯನ್ನು ರಕ್ಷಿಸುವುದು, ಸಮುದಾಯವನ್ನು ಸುರಕ್ಷಿತವಾಗಿಡುವುದು ಹಾಗೂ ಹಬ್ಬಗಳು ಶಾಂತಿಪೂರ್ಣವಾಗಿ, ಉಲ್ಲಾಸದಿಂದ ನಡೆಯುವಂತೆ ಮಾಡುವುದಕ್ಕೆ ಮಂಗಳೂರು ನಗರ ಪೊಲೀಸ್ ಇಲಾಖೆ ಸಂಪೂರ್ಣ ಬದ್ಧವಾಗಿದೆ.
ಜವಾಬ್ದಾರಿಯುತ ನಾಗರಿಕರು ಹಾಗೂ ವಿವಿಧ ಸಂಘಟನೆಗಳ ಸಹಕಾರದೊಂದಿಗೆ ಮಾದಕ ದ್ರವ್ಯ ಪಿಡುಗನ್ನು ಪರಿಣಾಮಕಾರಿಯಾಗಿ ಎದುರಿಸಿ, ನಗರವನ್ನು ಸುರಕ್ಷಿತ ಹಾಗೂ ಆರೋಗ್ಯಕರವಾಗಿಟ್ಟುಕೊಳ್ಳಲು ಸಾಧ್ಯವೆಂಬ ವಿಶ್ವಾಸವನ್ನು ಪೊಲೀಸ್ ಇಲಾಖೆ ವ್ಯಕ್ತಪಡಿಸಿದೆ.
